جنگ بندی کرنی ہے تو امریکا اسرائیل کو ہتھیار بھیجنا بند کردے، الہان عمر

شکاگو: امریکا کی ڈیموکریٹک رکن کانگریس الہان عمر نے امریکی وزیر خارجہ انٹونی بلنکن کی اسرائیل میں تذلیل کو شدید تنقید کا نشانہ بنایا ہے۔ شکاگو میں نیوز کانفرنس کے دوران الہان عمر نے کہا کہ اسرائیل کے دورے کے دوران میں انٹونی بلنکن غزہ جنگ بندی کے معاہدے کے لیے پیش رفت حاصل کرنے میں ناکام رہے۔ انہوں نے کہا کہ ہم اپنے سیکریٹری خارجہ کو ایسی صورتحال کو ختم کرنے کی بھیک مانگنے کیلئے کیسے گیارہ بار اسرائیل جانے کی اجازت دیتے ہیں جو صورتحال ہم نے بموں اور ہتھیاروں کی فراہمی جاری رکھ کر پیدا کی ہوئی ہے۔ انہوں نےکہا کہ ہمارے سیکریٹری خارجہ مصر جانے سے پہلے گیارہویں بار کہتے ہیں کہ ہم جنگ بندی کے قریب ہیں اور اسرائیلی وزیراعظم نیوز کانفرنس کرکے کہیں کہ ہم کوئی معاہدہ نہیں کررہے۔ انہوں نے سوال اٹھایا کہ کیا ہمیں اپنے نمائندوں کی تذلیل پر شرم نہیں آتی ہے۔ کیا یہ کہنا منافقت نہیں ہے کہ ہم بین الاقوامی قانون کا احترام کرتے ہیں؟ انہوں نے کہا کہ اگر آپ واقعی جنگ بندی چاہتے ہیں تو آپ صرف اسرائیل ہتھیار بھیجنا بند کر دیں۔