جنگ جاری رہی تو لبنان کو اسرائیل کیلئے جہنم بنا دینگے، حزب اللہ

بیروت : حزب اللہ کے سیکریٹری جنرل شیخ نعیم قاسم نے کہا ہے کہ مزاحمت اسرائیلی یا امریکی دباؤ کے سامنے کبھی ہتھیار نہیں ڈالے گی۔ جنگ جاری رہی تو میدانِ جنگ کو اسرائیل کے لیے جہنم بنا دیا جائے گا۔ شیخ نعیم قاسم نے مزاحمت کاروں کے نام پیغام میں کہاکہ لبنان کے خلاف جاری جنگ دراصل امریکا اور اسرائیل کی مشترکہ مہم ہے، جس کا مقصد لبنان کو زیرِنگیں لانا ہے۔ شیخ نعیم قاسم کا کہنا تھا کہ حزب اللہ کسی صورت دباؤ قبول نہیں کرے گی اور لبنان و اس کے عوام کے دفاع کا سلسلہ ہر قربانی کے باوجود جاری رکھا جائے گا۔ نعیم قاسم نے کہا کہ لبنان کے باہر کی کوئی قوت حزب اللہ کو غیرمسلح نہیں کرسکتی۔ حزب اللہ لبنانی حکومت کے ساتھ تعاون کے لیے تیار ہے تاکہ اسرائیلی حملے بند ہوں، اسرائیلی فوج لبنان سے نکلے، لبنانی قیدیوں کو رہا کیا جائے۔ انہوں نے کہا کہ دشمن آخرکار شکست تسلیم کرنے پر مجبور ہوگا اور مزاحمت میدان نہیں چھوڑے گی۔