قوم موجودہ دور کے یزید کے خوف سے باہر نہ نکلی تو تاریخ معاف نہیں کرے گی، عمران خان

اپر دیر : پاکستان تحریک انصاف کے چیئرمین عمران خان نے کہا ہے کہ قوم اس دور کے یزید کے خوف سے باہر نہ نکلی تو تاریخ اور آنیوالی نسلیں معاف نہیں کریں گی۔ اپردیر میں جلسے سے خطاب میں عمران خان نے کہا کہ ایک اسلامی فلاحی ریاست کا قیام جس کے لیے ہمارے عظیم لیڈر قائد اعظم نے جدوجہد کی تھی، امریکا کے ساتھ مل کر بھارت اور اسرائیل نے سازش کی تھی، انہوں نے شہباز شریف کو ہمارے اوپر مسلط کیا، اس کو اس لیے لے کر آئے جو حکم اس کے آقا کرتے ہیں، یہ وہ سارے حکم مانے گا۔ اسرائیل میں پہلی مرتبہ پاکستانی گئے جن میں سرکاری ادارے میں کام کرنے والا شخص بھی شامل ہے، یہ ساری کوشش ہے کہ امریکا، اسرائیل اور بھارت کا ایجنڈا پاکستان پر نافذ کیا جائے اور پاکستان کو غلام بنایا جائے لیکن ہم نے کسی صورت یہ غلامی تسلیم نہیں کرنی۔ آج ہماری معیشت جس طرف جارہی ہے اس سے ملک کو خطرہ ہے اور اگر معیشت مضبوط نہ ہو تو صرف فوج بھی ملک کی حفاظت نہیں کر سکتی،یہ قومی سلامتی کا مسئلہ ہے، جتنی معیشت کمزور ہو گی، ہماری سیکیورٹی بھی کمزور ہو گی، شہباز شریف سے ایک سوال پوچھتا ہوں کہ اگر آپ سے حکومت نہیں ہوتی تھی تو یہ سازش کیوں کی؟فضل الرحمان بھیس بدل کر عمرے پر گیا ہے تاکہ چور چور کے نعرے نہ سننے پڑیں، فضل الرحمان سمیت یہ لوگ عوام میں نہیں نکل سکتے انھیں منہ چھپانا پڑتا ہے۔