ملک نیچے جاتا رہا تو قوم آپ کو ذمہ دار ٹھہرائے گی، عمران خان کا اسٹیبلشمنٹ کو پیغام

گوجرانوالہ : سابق وزیر اعظم عمران خان نے کہا ہے کہ اگر ملک اسی طرح نیچے جاتا رہا تو قوم اسٹیبلشمنٹ کو قصوروار ٹھہرائے گی جو خود کو نیوٹرل کہتے ہیں۔ گوجرانوالہ میں تحریک انصاف کے جلسے سے خطاب میں عمران خان کا کہنا تھا کہ میرا سوال ہے کہ جن لوگوں نے سازش کر کے ان لوگوں کو ہم پر مسلط کیا، میں ان سے پوچھتا ہوں کہ کیا آپ کو پاکستان کی فکر نہیں۔ کیا آپ کو خوف نہیں آ رہا کہ ملک کدھر جا رہا ہے۔ جب تک ملک میں صاف و شفاف الیکشن نہیں ہوتے۔ سیاسی استحکام نہیں آتا تو معیشت ایسے ہی نیچے جاتی رہے گی۔ ساری قوم کو پیغام دینے آیا ہوں کہ میں قوم کو آخری کال دوں گا، قوم کو تیار کروں گا کہ ہم اپنے آپ کو ان سے حقیقی طور پر آزاد کرائیں۔ان کا کہنا تھا کہ میں نے تمام ضلعی تنظیموں کو خط لکھا ہے کہ تیار ہو جاؤں اور جب میں کال دوں گا سب نے تیار ہونا ہے۔ میں اپنی تیاری کر رہا ہوں۔ لوگ تیار رہیں کہ اگر انتخابات نہیں کروائیں گے تو سڑکوں پر آ کر پُرامن احتجاج کر کے زبردستی الیکشن کروائیں گے۔ کیونکہ ہمیں نظر آ رہا ہے کہ یہ الیکشن سے بھاگ رہے ہیں۔ ہم نے انھیں الیکشن میں لے کر آنا ہے۔
عمران خان نے کہا کہ آخر میں اسٹیبلشمنت سے سوال کرنا چاہتا ہوں۔ مجھے پتا ہے آپ کہتے ہیں آپ نیوٹرل ہیں۔ لیکن قوم آپ کو ذمہ دار ٹھہرائے گی اگر یہ ملک اسی طرح نیچے جاتا رہا۔ قوم آپ کو ذمہ دار ٹھہرائے گی کہ آپ ملک کو دلدل میں پھنسنے سے روک سکتے تھے۔ اور آپ نے کچھ نہیں کیا۔ معیشت نیچے گئی تو قوم آپ کو قصور وار ٹھہرائے گی۔ وہ ہماری قومی سلامتی پر اثر انداز ہوگی۔ ابھی بھی وقت ہے ملک کو نیچے جانے سے بچائیں ۔آئی ایم ایف کہہ رہا ہے معیشت سکڑتی جا رہی ہے اور پاکستان سری لنکا کی طرف جا رہا ہے، سڑکوں پر انتشار ہونے جا رہا ہے۔