حماس معاہدہ قبول نہ کرے تو اسے نکال دو، امریکا کا قطر کو دھمکی آمیز پیغام

دوحہ : حماس جنگ بندی قبول نہ کرے تو اس کا دفتر بند کرکے ملک بدر کردیا جائے۔ امریکا نے قطر کو دھمکی آمیز پیغام پہنچادیا۔ امریکی وزیر خارجہ انٹونی بلنکن نے کہاہے کہ امریکا جنگ بندی اور اسرائیلی یرغمالیوں کی رہائی کیلئے پرعزم ہے مگر اس میں حماس رکاوٹ بنی ہوئی ہے۔ انہوں نے کہا کہ یہی وقت ہے، ہم نے تجویز پیش کردی ہے، اس میں کوئی تاخیر یا کوئی بہانہ قبول نہیں کریں گے۔ امریکی اخبار کی رپورٹ کے مطابق قطری حکام نے حماس سربراہ اسماعیل ہنیہ اور دوسرے عہدیداروں کو اپنے لیے متبادل انتظامات کیلئے تیار رہنے کا مشورہ دیدیا ہے۔ امریکی اخبار کی رپورٹ کے مطابق امریکی عہدیدار نے دعویٰ کیا کہ انٹونی بلنکن نے غزہ میں جنگ بندی اور یرغمالیوں کی رہائی کیلئے مذاکرات کی طوالت پر امریکی بے صبری کا یہ پیغام قطری وزیراعظم کو پہنچا دیا ہے۔ قطر نے 2012 میں امریکا کی درخواست پر حماس کو میزبانی کی پیش کش کی تھی تاکہ حماس کی قیادت سے رابطوں کا ایک چینل موجود رہے تاہم گزشتہ چند مہینوں سے اسرائیلی یرغمالیوں کی بازیابی میں ناکامی کے بعد امریکی بے چینی اور بے صبری میں اضافہ ہوگیا ہے۔