کوئی اقدام اٹھایا تو چین سے نہیں بیٹھنے دیں گے، ایران کا صیہونی حکومت کو انتباہ

تہران : ایران کے صدر ابراہیم رئیسی نے خبردار کیا ہے کہ اگر صیہونی حکومت نے ان کے ملک کو نشانہ بناتے ہوئے کوئی بھی اقدام اٹھایا تو وہ اسے چین سے نہیں بیٹھنے دیں گے۔ ایرانی مسلح افواج اسرائیل کی نگرانی کر رہی ہیں۔اگر اس نے ایرانی قوم کے خلاف ذرا سی بھی حرکت کی تو وہ ریاست کے مرکز کو نشانہ بنائیں گے۔ یوم افواج کے موقع پر تقریب سے خطاب میں ابراہیم رئیسی نے کہا کہ صیہونی حکومت کے لیے واضح پیغام یہ ہے کہ اگر آپ خطے کے ممالک کے ساتھ تعلقات کو معمول پر لانے کی کوشش کرتے ہیں تو آپ کو جان لینا چاہیے کہ آپ کا معمولی سا اقدام بھی ہماری مسلح افواج۔ انٹیلی جنس اور سیکیورٹی فورسز کی نظروں سے پوشیدہ نہیں ہے۔ صدر رئیسی نے کہا کہ اسلامی جمہوریہ کی مسلح افواج کے پاس بہت سی صلاحیتیں ہیں، انہوں نے کہا کہ مخلص اور پرہیزگار ارکان ہیں جو ملک کی خاطر خطرات کا مقابلہ کرنے کے لیے تیار ہیں۔ ہماری عسکری صلاحیتیں نہ صرف خطے میں بلکہ پوری دنیا میں مشہور ہیں۔ ایران میں طاقت کا سب سے اہم جز ملک کے انقلابی عوام ہیں۔