مجھے حجاب سے پیار ہے، بھارت میں مسلم طالبات کی مہم

بنگلورو: بھارتی ریاست کرناٹک میں طالبات کے حجاب پر پابندی کے خلاف طلبا نے مجھے حجاب سے پیار ہے، مہم کا آغاز کردیا۔ بھارتی میڈیا کے مطابق ریاست کرناٹک میں طلبہ و طالبات بڑی تعداد میں تاریخی مقام پر جمع ہوئے حجاب پر پابندی کے خلاف شدید احتجاج کیا۔ پوری ریاست میں مختلف مقامات پر طلبہ و طالبات اس تحریک کو زور و شور سے چلا رہے ہیں۔ مجھے حجاب سے پیار ہے مہم کا آغاز کرناٹک میں حجاب پہنی طالبات کے اسکول اور کالجوں میں داخلے پر پابندی کے تواتر سے ہونے والے واقعات کےبعد ہوا ہے۔طلبا کا مطالبہ تھا کہ حجاب ذاتی چوائس ہے اور بنیادی حق بھی ہے اس لیے کسی بھی حکومت کو اس پر اپنی مرضی مسلط نہیں کرنا چاہیئے۔ مسلم طلبا نے اعتراض اُٹھایا کہ کالجوں میں ہندو طلبا زعفرانی رنگ کا اسکارف پہنتے ہیں جو ان کا مذہبی علامتی رنگ ہے لیکن اس پر پابندی عائد نہیں کی جاتی۔کرناٹک حکومت کے اسکولوں میں حجاب پر پابندی کے خلاف طلبا نے عدالت کا دروازہ بھی کھٹکٹایا ہے لیکن اب تک سنوائی نہیں ہوسکی ہے۔