Raza Musani 
نیویارک: اقوام متحدہ نے خبردار کیا ہے کہ غزہ میں انسانی بحران بدترین سطح پر پہنچ چکا ہے اور لاکھوں افراد قحط کے خطرے سے دوچار ہیں۔ اقوام متحدہ کے دفتر برائے رابطہ انسانی امور اوچا نے کہا ہے کہ غزہ میں زندگی کے حالات غیر معمولی طور پر تباہ کن ہو چکے ہیں۔ ادارے کے مطابق غزہ کی 67 فیصد آبادی شدید غذائی عدم تحفظ کا شکار ہے اور روزانہ ایک وقت کا کھانا حاصل کرنے کے لیے جدوجہد کر رہی ہے۔ رپورٹ میں کہا گیا ہے کہ غزہ کی 10 فیصد آبادی قحط کے اعلان سے پہلے کے مرحلے تک پہنچ چکی ہے۔ اوچا نے اس صورتحال کی وجہ امدادی سامان کی ترسیل میں رکاوٹ، مقامی سپلائی چین کے خاتمے اور امدادی سرگرمیوں کے لیے فنڈز کی شدید کمی کو قرار دیا۔ ادارے نے فوری طور پر سرحدی گزرگاہیں کھولنے اور امدادی سامان کی بلا رکاوٹ ترسیل کا مطالبہ کیا ہے۔
