Raza Musani 
بیروت : حزب اللہ کی جانب سے شمالی اسرائیل پر بڑا حملہ کیا گیا ہے۔ لبنان کی مزاحمتی تحریک حزب اللہ کا کہنا ہے کہ اس نے شمالی مقبوضہ علاقوں میں اسرائیلی فوجی پوزیشن کو نشانہ بنایا ہے۔ حزب اللہ نے پیر کے روز ایک بیان میں کہا کہ کاتیوشا راکٹ اسرائیل کے 146 ویں ڈویژن کے نئے قائم کردہ ہیڈکوارٹر پر فائر کیے گئے۔ یہ آپریشن جنوبی لبنان کے شہری علاقوں، خاص طور پر ماروب قصبے میں اسرائیل کے حملوں کے جواب میں کیا گیا۔
حزب اللہ کے اعلان کے مطابق اس نے اتوار اور پیر کی درمیانی شب شمالی اسرائیل پر درجنوں راکٹ داغے ہیں۔
دوسری جانب اسرائیلی فوج کا کہنا ہے کہ لبنان کی سمت سے 30 راکٹ داغے گئے جن میں زیادہ تر راکٹ کھلے خالی علاقوں میں گرے۔
اس سے قبل اتوار کو اسرائیلی فوج نے اعلان کیا تھا کہ اس نے جنوبی لبنان میں العدیسہ قصبے میں حزب اللہ کی کئی عسکری تنصیبات کو نشانہ بنایا۔
سات اکتوبر کو غزہ کی جنگ چھڑ جانے کے بعد حزب اللہ اور اسرائیل کے درمیان لڑائی جاری ہے۔
چند روز قبل حزب اللہ کے سربراہ حسن نصر اللّٰہ نے اسماعیل ہانیہ اور اپنے کمانڈر فواد شکر کی شہادت کا بدلہ لینے کا اعلان کرتے ہوئے کہا تھا کہ اسرائیل پر حملہ جلد ہونے جارہا ہے، حملے کے وقت سے متعلق بے یقینی اسرائیل کی سزا کا حصہ ہے۔
