رامات ڈیوڈ ایئر بیس، حیفا اور الجلیل پر حزب اللہ کے شدید حملے

بیروت : حزب اللہ نے رات گئے اسرائیل کے فوجی ٹھکانوں کو راکٹوں سے نشانہ بنایا۔ حیفا کے جنوب مشرق میں واقع رامات ڈیوڈ بیس پر فادی ون اور فادی ٹو میزائلوں سے حملہ کیا گیا۔ حملے سے حیفا کے جنوب میں یوکونام میں سائرن بج اٹھے۔ کریات اور بالائی الجلیل پر بھی راکٹ داغے گئے۔ حزب اللہ نے حیفا کے جنوب کی طرف بھی 100 سے زیادہ میزائل داغے جس سے کئی مقامات پر آگ بھڑک اٹھی۔ جبکہ تین افراد زخمی ہوگئے۔ حزب اللہ نے حیفہ اور ناصرت کے اردگرد کے علاقوں کو نشانہ بنایا۔ حزب اللہ نے حیفہ میں 15 اور گولان میں 90 راکٹ فائر کئے۔ اسرائیل نے دعویٰ کیا ہے کہ زیادہ تر راکٹوں کو روک دیا گیا ہے۔ اس سے پہلے اسرائیل نے لبنان کے سرحدی علاقوں میں چار سو سے زائد حملے کرنے کا دعویٰ کیا ہے۔
ادھر بیروت پر حملے میں شہداء کی تعداد انتالیس ہوگئی ہے جبکہ اب بھی تئیس افراد لاپتہ ہیں۔