حماس غزہ کا انتظام چلانے کے لیے مشترکہ کمیٹی پر متفق

غزہ : حماس نے جنگ کے بعد غزہ کا انتظام چلانے کے لیے مشترکہ فلسطینی کمیٹی بنانے کی مصری تجویز کو قبول کر لیا ہے۔ حماس نے ایک بیان میں کہا کہ قاہرہ میں فتح کے وفود سے مشاورت ختم کر دی ہے۔ اس مشاورت میں دونوں تحریکوں کے درمیان اختلافات کو ختم کرنے اور غزہ کے معاملات کے انتظام میں مشترکہ رابطہ کاری اور تعاون پر اتفاق کیا گیا ہے۔ اتفاق رائے کیا گیاہے کہ پہلے سے طے شدہ فریم ورک پر عمل درآمد کے ذریعے غزہ کو چلانے کے لیے کمیٹی بنائی جائے۔ بیان میں کہا گیا ہے کہ تنظیم نے کمیونٹی سپورٹ کمیٹی کی تشکیل کے لیے مصری تجویز کی منظوری سے آگاہ کیا جو جامع قومی میکانزم کے ذریعے کام کرے گی۔ حماس کے وفد نے غزہ اور مغربی کنارے میں پیش رفت پر بات چیت کے لیے ایک اور فلسطینی گروپ پاپولر فرنٹ فار دی لبریشن آف فلسطین سے بھی بات چیت کی۔