Ilyas 
شامی فوج کی ڈرامائی انداز میں پیش قدمی، اہم علاقوں کفر حمرہ، حریتان اور عندان پربھی قبضہ، فوج نے دہشت گردوں کو بھاگنے پر مجبور کردیا، شہر پر 2011 میں باغیوں نے قبضہ کرلیا تھا
ہزاروں شامی باشندے قومی پرچم لہراتے سڑکوں پر نکل آئے، شام اور ترکی کے درمیان ادلب کے معاملے پر کشیدگی،150 ٹرکوں پر مشتمل ترک فوج کا قافلہ ادلب میں داخل ہوگیا
دمشق(نیوز ڈیسک) شام کی فوج نے دہشت گردوں کو شکست دے کر نو سال بعداہم شہر حلب پر دوبارہ قبضہ کرلیا، فوج نے شہر کے تمام اہم مقامات کا کنٹرول سنبھال لیا،شامی فوج نے پیش قدمی کرتے ہوئے اہم علاقوں کفر حمرہ، حریتان اور عندان پربھی قبضہ کرکے دہشت گردوں کو بھاگنے پر مجبور کردیا، شہر پر 2011 میں باغیوں نے قبضہ کرلیا تھا، فوج نے سڑکوں سے رکاوٹیں ہٹاکر سڑکیں بحال کرنا شروع کردی ہیں، روس اور ترکی کے درمیان معاہدے میں حلب کے اطراف کے علاقوں کو شامی حکومت کے حوالے کرنے پر بات کی گئی تھی، معاہدے کے بعد حزب اللہ اور دیگرحکومت کی حامی ملیشیا نے پیش قدمی کرتے ہوئے حلب کے اطراف میں کئی مقامات کا کنٹرول سنبھال لیا تھا،روس کے لڑاکا طیاروں نے حلب کے دیہی علاقے میں مغربی پٹی پر متعدد علاقوں کے علاوہ حلب شہر کے شمال میں دیگر علاقوں کو بھی فضائی حملوں کا نشانہ بنایا،حلب سے باغیوں کے پسپا ہوتے ہی ہزاروں شامی باشندے قومی پرچم لہراتے سڑکوں پر نکل آئے، شہریوں نے شہر میں گشت کیا،ادھر شام اور ترکی کے درمیان ادلب کے معاملے پر کشیدگی بڑھ گئی ہے، ترکی نے اپنی فوجی پوزیشن مضبوط بنانے کیلئے مزید فوج اور سازوسامان ادلب بھیج دیا، 150 ٹرکوں پر مشتمل قافلہ ادلب میں داخل ہوگیا۔
