Raza Musani 
تہران : ولی امر مسلمین آیت اللہ خامنہ ای نے کہا ہے کہ اسلامی ملکوں کو چاہئے کہ وہ صیہونی حکومت کی سیاسی اور اقتصادی شہہ رگ کاٹ کر اس سے اپنا ہر طرح کا رابطہ منقطع کرلیں۔ تہران کے شہدا کی یاد میں کانفرنس منعقد کرنے والی کمیٹی کے ارکان سے خطاب میں ولی امر مسلمین نے غزہ جیسے انتہائی اہم مسئلے پر اسلامی ملکوں کے رویہ اور کارکردگی پرتنقید کی۔ انہوں نے کہا کہ بعض اوقات حساس مواقع پر اسلامی ممالک کے حکام غلطی کرتے ہیں۔ غزہ میں جنگ بندی کی بات کرتے ہیں جوکہ ان کے بس کی بات نہیں بلکہ صیہونی حکومت کے دائرہ اختیار میں ہے۔ اسلامی ممالک کو ان مسائل پر بات کرنا چاہئے جو ان کے اختیار میں ہیں۔ اسلامی ممالک کے اختیارات میں یہ ہے کہ صیہونی حکومت کی شہہ رگ پر چھری رکھیں۔ مسلمان ممالک کو اسرائیل کی مدد کے بجائے اس کے ساتھ سیاسی اور اقتصادی تعلقات منقطع کرنا چاہئے۔ انہوں نے کہاکہ غزہ کے عوام تمام تر مشکلات اور مصائب و آلام کے باوجود فاتح اور کامیاب رہیں گے۔ جیسا کہ قرآن کریم میں ارشاد ہوتا ہے کہ اللہ صاحبان ایمان کے ساتھ ہے اور جہاں بھی ہوں گے کامیاب رہیں گے۔ ولی امر مسلمین نے کہا کہ غزہ کے عوام کی فتح اور کامیابی یقینی ہے اور خداوند عالم عنقریب یہ فتح و کامرانی امت مسلمہ کو دکھائے گا اور پوری دنیا کے مسلمان اور خاص طور پر فلسطین اور غزہ کے عوام کے دل خوش ہو جائیں گے۔
