Raza Musani 
گلگت : مرکزی انجمن امامیہ گلگت بلتستان کے صدر کی کوششوں سے گزشتہ آٹھ روز سے دھرنے میں بیٹھی لیڈی ہیلتھ ورکرز اور حکومت کے درمیان مذاکرات کامیاب ہو گئے۔ گلگت میں وزیر اعلیٰ سیکرٹریٹ کے باہر گزشتہ 8 روز سے درجنوں خواتین شدید سردی میں دھرنا دئیے بیٹھی تھیں۔ لیڈی ہیلتھ ورکرز کی آسامیوں پر کامیاب امیدواروں نے جوائننگ لیٹر جاری نہ ہونے اور حکومت کی جانب سے تقرریوں کو معطل کرنے کیخلاف احتجاج کیا جا رہا تھا۔ مظاہرین سے اظہار یکجہتی کیلئے مختلف سیاسی و مذہبی لیڈر بھی آ رہے تھے۔ حکومت کی جانب سے دھرنا ختم کرنے کی تمام تر کوششیں ناکام ہو رہی تھیں اور دھرنا طول پکڑ رہا تھا۔ دریں اثناء مرکزی انجمن امامیہ کے صدر ساجد علی بیگ نے حکومت اور مظاہرین میں مذاکرات کرائے اور کامیاب بنانے میں کلیدی کردار ادا کیا۔ جس کا اعتراف وزیر صحت حاجی گلبر خان نے بھی کیا۔
