Raza Musani 
اسلام آباد: پاکستان میں مون سون کی بارشوں سے آنے والے سیلاب کے باعث جس وسیع پیمانے پر تباہی اور جانی نقصان ہوا ہے اس کے پیش نظر اقوام متحدہ 30 اگست کو 16 کروڑ ڈالر کی فلیش اپیل کرے گا۔ امداد کی یہ اپیل جینوا اور اسلام آباد سے بیک وقت شروع ہوگی۔ ادھر آذربائیجان نے سیلاب متاثرین کی امداد کے لیے 20 لاکھ ڈالر کی امداد فراہم کرنے کا اعلان کیا ہے۔ فرانس کے صدر ایمانوئیل میکخواں نے کہا ہے کہ وہ پاکستانی عوام، ان میں لاپتہ ہونے والے لاتعداد افراد کے خاندانوں، اور متاثرین کے ساتھ ہیں۔ فرانس مدد کے لیے تیار ہے۔ ترکی نے بارشوں اور سیلاب سے متاثرہ افراد کی امداد کے لیے امدادی سامان پر مشتمل طیارہ پاکستان روانہ کرنے کا اعلان کیا ہے۔
