Raza Musani 
ویانا: اقوام متحدہ کے ویانا ہیڈ کوارٹر میں تعینات ایران کے مستقل مندوب محمد رضا غائبی نے کہا ہے کہ جامع ایٹمی معاہدے کی بحالی سے قبل آئی اے ای اے کو اصفہان کی نئی ایٹمی تنصیبات کی نگرانی سے متعلق معلومات فراہم نہیں کی جائیں گی۔ محمد رضاغائبی نے ویانا میں صحافیوں کو بتایا کہ آئی اے ای اے کی رپورٹ ، اس ادارے کی معمول کی اپ ڈیٹ رپورٹ ہے اور جس میں ایران کی ایٹمی سرگرمیوں سے متعلق جدید ترین فنی معلومات سے بورڈ آف گورنرز کو آگاہ کیا جاسکتا ہے۔ ایران نے آئی اے ای اے کو اطلاع دی ہے کہ وہ سینٹری فیوج مشینوں کے پارٹس، کرج کے کمپلکس کے بجائے، اصفہان کی جدید تنصیبات میں تیار کرنا چاہتا ہے۔آئی اے ای اے نے پیر کے روز بتایا ہے کہ ایران نے اس بات سے آگاہ کیا ہے کہ سینٹری فیوج مشنیوں کے پارٹس اصفہان میں قائم نئی تنصیبات میں تیار کرنے کا ارادہ رکھتا ہے۔ آئی اے ای اے نے یہ بھی بتایا ہے کہ اس نے نگرانی کے کیمرے اصفہان کی نئی ایٹمی تنصیبات میں نصب کردیئے ہیں۔ایران نے اور آئی اے ای اے نے گزشتہ سال دسمبر میں ، کرج کے کامپلکس میں نگرانی کے جدید ترین کیمرے نصب کرنے پر اتفاق کیا تھا۔ یہ کیمرے گزشتہ سال کے وسط میں ہونے والی تخریب کاری کے نتیجے میں خراب ہوگئے تھے ۔
