اسرائیل اور حزب اللہ میں شدید لڑائی، رات بھر فائرنگ کا تبادلہ

بیروت : اسرائیلی فوج اور حزب اللہ میں شدید لڑائی چھڑ گئی ہے۔ فریقین کے درمیان رات بھر فائرنگ کا تبادلہ جاری رہا۔ اسرائیلی فوج نے جنوبی لبنان کے علاقے مرجائیون میں راکٹ لانچر پر حملوں کا دعویٰ کیا ہے۔ جبکہ جنوبی دیہات سمیت محفوظ علاقوں کو بھی بمباری کا نشانہ بنایا گیا۔ کفر کیلا اور دیر سریان کے دیہات پر بھی حملے کئے گئے۔ صیہونی فوج کے حملوں میں متعدد شہری زخمی ہوگئے۔ صیہونی حملوں کے جواب میں حزب اللہ نے شمالی اسرائیل میں بیت ہلیل کی طرف درجنوں راکٹ داغ دئے۔ حزب اللہ نے پہلی بار اس صیہونی بستی کو نشانہ بنایا ہے۔ حزب اللہ نے صیہونی فوج کے ٹھکانوں پر بھی راکٹ داغے۔
فرانس کے وزیر خارجہ اسٹیفن سیجورن نے اپنے امریکی ہم منصب انٹونی بلنکن سے ٹیلی فونک رابطے میں خطے میں بڑھتی ہوئی کشیدگی پر تبادلہ خیال کیا۔ دونوں وزرائے خارجہ نے مشرق وسطیٰ میں تمام فریقین پر زور دیا کہ وہ صورتحال کو علاقائی تنازعہ میں بدلنے سے روکنے کے لیے انتہائی تحمل سے کام لیں۔