ایف آئی اے کو عمران خان کیخلاف کارروائی کا اختیار، اہم رہنماؤں کے خلاف کریک ڈاؤن کا فیصلہ

اسلام آباد: حکومت نے پی ٹی آئی کے اہم رہنماؤں کے خلاف کریک ڈاؤن کا فیصلہ کرلیا ۔ پاکستان تحریک انصاف کی جانب سے احتجاج کی کال پر اسلام آباد انتظامیہ میں کھلبلی مچ گئی۔ قانون نافذ کرنے والے اداروں نے رات گئے اہم اجلاس کیا اور راستوں کی ممکنہ بندش کے حوالے سے اہم فیصلے کئے۔ اجلاس میں بتایا گیا کہ پرویز خٹک، شیخ راشد شفیق اور عامر کیانی کے وارنٹ گرفتاری حاصل کرلئے گئے ہیں۔ اجلاس میں علی امین گنڈا پورا اور ملک عامر ڈوگر کو بھی گرفتار کرنے کا فیصلہ کیا گیا۔ فیصلہ کیا گیا کہ اسلام آباد ائیرپورٹ تک رینجرز۔ ایف سی اور وفاقی پولیس گشت کرے گی اور ائیر پورٹ روڈ بند کرنے والوں کے خلاف فوری کارروائی کی جائے گی۔ ادھر حکومت نے ریاست اور اداروں کے خلاف عوام کو اکسانے کے الزام میں ایف آئی اے کو عمران خان، شاہ محمود اور دیگر رہنماؤں کے خلاف کارروائی کا اختیار دے دیا۔ سوشل میڈیا سمیت اجتماعات میں حکومت، ریاستی اداروں اور شخصیات کے خلاف الزامات و پراپیگنڈا کے ذریعے عوام کو اکسانے کے جرم میں حکومت نے ایف آئی اے کو پاکستان پینل کوڈ کے سکیشن 505 کے تحت کارروائی کا اختیار دے دیا۔