Raza Musani 
جدہ : اسلامی تعاون تنظیم نے فلسطین کو تسلیم کرنے کا فیصلہ واپس لینے کی خبروں پر سلووینیا اور یورپی یونین سے اظہارِ تشویش کیا ہے اور خبردار کیا ہےکہ اس فیصلے سے دو ریاستی حل کو نقصان پہنچے گا۔ اسلامی تعاون تنظیم کے سربراہ حسین ابراہیم طحہٰ نے سلووینیا کے وزیر خارجہ اور یورپی یونین کی اعلیٰ نمائندہ کاجا کیلس کو الگ الگ خطوط ارسال کیے ہیں۔ جس میں فلسطین کو تسلیم کرنے کا فیصلہ واپس لینے اور سفارت خانہ مقبوضہ یروشلم منتقل کرنے کو بین الاقوامی قانون اور اقوام متحدہ کی سلامتی کونسل کی متعلقہ قراردادوں کی صریح خلاف ورزی قرار دیاہے۔
خطوط میں کہا گیا کہ یہ فیصلہ یورپی یونین کے اس مؤقف سے بھی متصادم ہوگا جس کے تحت مقبوضہ یروشلم پر اسرائیلی خودمختاری کو تسلیم نہیں کیا جاتا۔ سیکریٹری جنرل نے خبردار کیا کہ اس سے دو ریاستی حل کو نقصان پہنچے گا جبکہ فلسطینی عوام کے حقوق متاثر اور اور مسلمانوں و مسیحیوں کے مذہبی جذبات مجروح ہوں گے۔ او آئی سی نے یورپی یونین سے مطالبہ کیا کہ وہ سلووینیا کو فلسطین کو تسلیم کرنے کا اپنا مؤقف برقرار رکھنے اور مقبوضہ یروشلم سے متعلق کسی بھی یکطرفہ اقدام سے باز رکھنے کی ترغیب دے۔
