Raza Musani 
لاہور: لاہور کی انسداد دہشت گردی کی خصوصی عدالت نے جوہر ٹاؤن دھماکے میں ملوث تین مجرمان کو پانچ پانچ بار سزائے موت کا حکم دے دیا ہے۔ مقدمے میں پیٹر پال، عید گل اور سجاد سمیت 4 مجرموں کو پہلے ہی سزائے موت سنائی جا چکی ہے۔ انسداد دہشت گردی کی خصوصی عدالت نے تینوں مجرموں سمیع الحق، عزیر اکبر اور نوید اختر کی تمام جائیدادیں بھی بحق سرکار ضبط کرنے کا حکم دے دیا۔ ڈپٹی پراسیکیوٹر امجد جاوید اور شاہد سپرا نے ملزموں کے خلاف گواہان پیش کئے، سیکیورٹی خدشات کے پیش نظر سماعت ویڈیو لنک کے ذریعے کی گئی۔ ملزموں کے خلاف پراسیکیوشن نے 60 سے زائد گواہان کی شہادتیں قلمبند کرائیں، ملزموں کیخلاف سی ٹی ڈی نے چالان جمع کرا رکھا تھا۔ دو سال قبل لاہور میں جوہر ٹاؤن کے علاقے میں کالعدم لشکر طیبہ حافظ سعید کی رہائش گاہ کے باہر بم دھماکہ ہوا تھا، جس میں تین افراد ہلاک اور 13 زخمی ہوگئے تھے۔
