افزودہ یورینیم کا ذخیرہ کسی دوسرے ملک کے حوالے نہیں کیا جائےگا، ایران

تہران: ایرانی ذرائع نے دعویٰ کیا ہے کہ تہران نے اپنا افزودہ یورینیم ذخیرہ کسی دوسرے ملک کے حوالے کرنے پر ابھی تک اتفاق نہیں کیا۔ ایران کے جوہری پروگرام سے متعلق معاملات امریکا کے ساتھ ابتدائی معاہدے کا حصہ نہیں ہیں۔
ایرانی ذرائع نے خبر رساں ادارے رائٹرز کو بتایا ہے کہ تہران نے اپنا انتہائی افزودہ یورینیم ذخیرہ بیرون ملک منتقل کرنے پر کوئی رضامندی ظاہر نہیں کی۔ ذرائع کے مطابق ایران کے جوہری پروگرام کا معاملہ امریکا کے ساتھ ابتدائی سمجھوتے میں شامل نہیں تھا بلکہ اس پر حتمی مذاکرات کے دوران بات ہوگی۔ ایرانی حکام کا کہنا ہے کہ افزودہ یورینیم کے ذخیرے کو ملک سے باہر بھیجنے کے حوالے سے ابھی تک کوئی معاہدہ طے نہیں پایا۔ یہ بیان ایسے وقت سامنے آیا ہے جب امریکی اخبار نیو یارک ٹائمز نے دو امریکی عہدیداروں کے حوالے سے دعویٰ کیا تھا کہ ایران بظاہر اپنا یورینیم ذخیرہ ترک کرنے پر آمادہ ہوگیا ہے۔ رپورٹ کے مطابق یورینیم سے متعلق تفصیلات آئندہ مذاکرات میں طے کی جائیں گی جو کسی ممکنہ معاہدے کے بعد شروع ہوں گے۔