ملک بھر میں عید میلادالنبی ؐ، شہر شہر جلوس اور محافل

کراچی : پاکستان بھر میں جشن میلاد النبیﷺ بھرپور مذہبی جوش و جذبہ کے ساتھ منایا جارہا ہے۔ کراچی سمیت شہر شہر جلوس نکالے جارہے ہیں۔ سرکار کی آمد مرحبا کے نعروں کی گونج میں شہر شہر عاشقان مصطفیٰ صلی اللہ علیہ وآلہ وسلم سڑکوں پر نکل آئے۔ فضا درود و سلام سے معطر ہوگئی۔ فضا نعرہ تکبیر کی صداؤں سے گونج اٹھی۔ چھوٹے بڑے شہروں میں جلوس نکالے جارہے ہیں۔ کراچی میں 40 سے زائد علاقوں سے چھوٹے بڑے جلوس نکالے جارہے ہیں۔ یہ جلوس نشتر پارک سے نکالے جانیوالے مرکزی جلوس کا حصہ بن گئے۔ شاہراہیں ، مساجد، عمارتیں اور کاروباری مراکز برقی قمقموں سے جگمگاتے رہے۔ ہرطرف سبز پرچموں کی بہار ہے۔ اس موقع پر شیعہ سنی وحدت کا عملی مظاہرہ بھی دیکھا جا رہا ہے۔ مختلف شہروں میں جلوس کے راستوں میں اہل تشیع کی جانب سے برادران اہلسنت کے لیے سبیلیں اور نیاز کا اہتمام کیا گیا ہے۔