غزہ میں اسرائیلی فوج کے حملوں میں درجنوں فلسطینی شہید

غزہ :غزہ میں صیہونی بربریت تھم نہ سکی۔ غزہ کے زیتون ایریا میں اسکول پر بمباری سے گیارہ فلسطینی شہید ہوگئے ۔ جن میں سات بچے بھی شامل ہیں ۔جبکہ وسطیٰ اور شمال غزہ میں بھی چھ فلسطینی مارے گئے۔ دیرالبلاح میں کار سوار چار افراد بھی اسرائیلی بمباری کا نشانہ بنے ہیں۔ خان یونس اور رفح میں اسرائیلی فوج نے تین مکانوں پر میزائل حملہ کیا ہے جس میں سترہ فلسطینی شہید ہوئے ہیں۔ خان یونس اور دیر البلاح میں اسرائیلی فوج کے انخلا کے بعد لاشیں ملنے کا سلسلہ بھی جاری ہے ۔فلسطینی محکمہ صحت کو خان یونس کے ایک مکان کے ملبے سے دس افراد کی لاشیں ملی ہیں شہداء کی مجموعی تعداد چالیس ہزار سات سواڑتیس ہوگئی۔