امریکا سے مدد نہیں مانگتا، عوام کی طاقت پر انحصار ہے، عمران خان

لاہور: پی ٹی آئی کا عوامی حقیقی آزادی مارچ چیئرمین عمران خان کی قیادت میں اسلام آباد کی جانب رواں دواں ہے۔ تیسرے دن قافلے مریدکے سے اگلی منزل کی جانب روانہ ہوئے۔ مارچ کا جگہ جگہ بھرپور خیرمقدم کیا گیا۔ کارکنوں نے نعرے بازی سے ماحول گرمادیا۔ کارکنوں کی جانب سے گل پاشی کی گئی۔ راستے میں لگے استقبالی کیمپوں پر جشن کا سماں رہا۔ چپے چپے سے لوگ ملک کی حقیقی آزادی کیلئے نکل پڑے۔ قافلے گوجرانوالہ پہنچ کر رات وہیں قیام کریں گے۔ مریدکے میں لانگ مارچ کے شرکا سے خطاب میں عمران خان نے شہباز شریف کو مخاطب کرتے ہوئے کہا کہ میں ان سے بات کرتا ہوں جن سے ملنے آپ گاڑی کی ڈگی میں بیٹھ کر جایا کرتے تھے۔ شہباز شریف تمھارے پاس ہے کیا بات کرنے کے لیے، اور میں تمھیں کیوں پیغام پہنچاؤں گا، میں نے ان سے بات کی جو تمھیں اشاروں پر چلاتے ہیں اور ان سے بھی یہی کہا کہ ملک میں صاف اور شفاف الیکشن کروائے جائیں۔ انہوں نے کہا کہ میں امریکا سے مدد مانگتا ہوں اور نہ ہی کسی اور سے مدد مانگتا ہوں، میں نے کسی کی منتیں نہیں کیں بلکہ عوام کی طاقت سے وزیراعظم بنا تھا۔ عمران خان کا کہنا تھا کہ مریدکے کے جذبے اور جنون کو سلام پیش کرتا ہوں، رات کو لانگ مارچ اس لیے ختم کیا کیونکہ عوام کا سمندر رات کو نظر نہیں آنا تھا۔