اہلیان غزہ کو پانی سے محروم رکھنا نسل کشی ہے، ہیومن رائٹس واچ

واشنگٹن : انسانی حقوق کی تنظیم ہیومن رائٹس واچ کا کہنا ہے کہ اسرائیل کا غزہ میں فلسطینیوں کو جان بوجھ کر پانی تک مناسب رسائی سے محروم کرنا نسل کشی کے مترادف ہے۔ تنظیم ہیومن رائٹس واچ نے غزہ کی صورتحال پر 179 صفحات پر مشتمل رپورٹ جاری کردی۔ رپورٹ میں کہا گیاہے کہ اسرائیل نے پہلے غزہ کی واٹر لائن کاٹی اور بعد میں پائپ کے ذریعے بھی سپلائی کو محدود کر دیا۔ پانی اور صفائی کے بیشتر بنیادی ڈھانچے کو بیکار بنا دیا۔ رپورٹ کے مطابق یہ غفلت نہیں ہے بلکہ یہ اقدام جان بوجھ کر کیا گیا جس کی وجہ سے پانی کی کمی اور بیماری سے ہزاروں لوگوں کی موت واقع ہوئی ہے جو کہ انسانیت کے خلاف قتل و غارت گری کے جرم اور نسل کشی سے کم نہیں ہے۔ رپورٹ میں کہا گیاہے کہ ایسا کرنے والے اسرائیلی حکام انسانیت کے خلاف قتل و غارت اور نسل کشی کی کارروائیوں کے ذمہ دار ہیں۔