Raza Musani 
لندن: فلسطین کے سینکڑوں حامیوں نے شہر رفح پر اسرائیل کے وحشیانہ حملوں کے خلاف برطانوی وزیراعظم کے دفتر کے سامنے مظاہرہ کیا۔ رپورٹ کے مطابق صیہونی حکومت کے خلاف ہونے والے اس احتجاجی مظاہرے میں مختلف قوموں اور طبقات کے لوگ شریک تھے۔ مظاہرین اپنے ہاتھوں میں فلسطین کا پرچم اٹھائے ہوئے تھے اور مقبوضہ فلسطین کی آزادی کا مطالبہ کر رہے تھے۔ مظاہرین نے وزیر اعظم کے دفتر کی جانب جانے والی سڑک بلاک کردی، مظاہرین صیہونی حکومت کو ہتھیاروں کی ترسیل بند اور اسرائیلی سفیر کو برطانیہ سے باہر نکالا جائے کے نعرہ لگا رہے تھے۔
اس موقع پر برطانوی پارلیمنٹ کے کچھ ممبران اور شہری و سماجی شخصیات نے فلسطین کے مظلوم عوام کے ساتھ اظہار ہمدردی کا اعلان کیا۔ برطانوی ممبران پارلیمنٹ اور شہری و سماجی شخصیات نے اپنے خطاب میں فلسطین کے مظلوم عوام کے ساتھ ہمدردی کا اظہار کیا اور عالمی عدالت انصاف کے فیصلے پر عمل درآمد کا مطالبہ کیا۔ مقررین کا کہنا تھا کہ برطانوی عوام کا مؤقف حکومت کے مؤقف سے الگ ہے اور برطانوی وزیر اعظم صیہونی حکومت کے جرائم میں شریک اور فلسطینی عوام کے قاتل ہیں۔
