اقوام متحدہ ناکام قرار، ادارے کے نظام میں اصلاح کا مطالبہ

نیویارک: سعودی عرب نے اقوام متحدہ کو ناکام قرار دیتے ہوئے ادارے کے نظام میں اصلاح کا مطالبہ کردیا۔ سعودی وزیر خارجہ شہزادہ فیصل بن فرحان نے خبردار کیا کہ عالمی ادارے مقصد کے حصول کے لیے نااہل ہوچکے ہیں جیسا کہ اقوام متحدہ کی جانب سے اسرائیل مظالم کے لیے جوابدہ ٹھہرانے میں ناکامی سے ظاہر ہوتا ہے۔ نیویارک میں اقوام متحدہ کے ہیڈ کوارٹر میں خطاب کرتے ہوئے انہوں نے کہاکہ اقوام متحدہ کو بین الاقوامی امن اور سلامتی کو برقرار رکھنے میں اپنی ذمہ داری نبھانے کے لیے از سرِ نو تشکیل دیا جانا چاہیے۔ منصفانہ اور زیادہ مساوی عالمی نظام کے قیام کے لیے اقوام متحدہ کے نظام میں اصلاح ضروری ہوچکی ہے۔ سعودی وزیرخارجہ نے کہا کہ ہمیں کثیرالجہتی کو بھی فروغ دینا چاہیے تاکہ آج کے چیلنجوں اور مستقبل کے چیلنجوں کا مؤثر طریقے سے مقابلہ کیا جا سکے اور آنے والی نسلوں کے فائدے کے لیے امن اور سلامتی کو حاصل کیا جا سکے۔