غزہ میں خطرناک وبائی امراض پھیل سکتے ہیں، عالمی ادارہ

جنیوا : عالمی امدادی ادارے آکسفیم نے خبردار کیا ہے کہ غزہ میں خطرناک وبائی امراض پھیل سکتے ہیں۔ دنیا بھر میں صحت کے مسائل پر کام کرنے والے امدادی ادارے کی رپورٹ کے مطابق صحت وصفائی کے فقدان کے باعث غزہ میں لاکھوں انسانوں کی زندگیاں خطرے میں ہیں۔ ادارے کی رپورٹ کے مطابق رفح سمیت غزہ میں اسپتالوں کا تقریباً خاتمہ ہوگیا ہے۔ شہر میں جابجا کچرا پڑا ہے۔ سیوریج کا نظام مکمل تباہ ہوچکا ہے۔ پینے کے لیے صاف پانی دستیاب نہیں ہے۔ بچوں کو مختلف کیڑے اور مکوڑے کاٹ رہے۔ ہرطرف گندگی ہے اور ایسے میں لاکھوں افراد بہت مختصر سی جگہ پر ایک ساتھ رہ رہے ہیں اگر وبائی امراض پھیلتے ہیں تو پھر اس کا تدارک بہت مشکل ہوجائے گا۔ شہر میں بچوں میں پیٹ اور جلد کی امراض خطرناک حد تک بڑھ رہے ہیں۔ بھوک اور غذائی قلت کے باعث کئی بچے تاحیات ذہنی معذور ہوچکے ہیں۔ فوری اقدامات نہ کیے گئے تو بیماریوں سے لاکھوں انسان مرجائیں گے۔