Raza Musani 
اسلام آباد : عمران خان کی جانب سے لانگ مارچ کے اعلان کے بعد لاہور سمیت پنجاب، کراچی اور اسلام آباد میں پولیس پی ٹی آئی رہنماؤں اور کارکنوں پر ٹوٹ پڑی پولیس نے پنجاب, اسلام آباد اور کراچی کے مختلف علاقوں میں گھروں پر چھاپے مارے. پولیس کی کارروائیوں کے دوران پاکستان تحریک انصاف کے درجنوں کارکنوں کو حراست میں لے لیا گیا ہے۔ گارڈن ٹاؤن لاہور میں پی ٹی آئی کے رہنما حماد اظہر کے گھر پر چھاپے کے وقت وہاں یاسمین راشد سمیت دیگر رہنما بھی موجود تھے، پولیس کارروائی کیخلاف ڈاکٹر یاسمین راشد نے دھرنا دیا۔رات گئے پنجاب کے دیگر شہروں اور اسلام آباد میں بھی پی ٹی آئی رہنماؤں کے گھروں پر چھاپے مارے گئے۔ کراچی میں سندھ پولیس نے تحریک انصاف کے اراکین اسمبلی ارسلان تاج، بلال غفار، سعید آفریدی اور شاہ نواز جدون کے گھروں پر چھاپے مارے۔ سندھ پولیس نے سہراب گوٹھ سے رکن قومی اسمبلی سیف الرحمان محسود کو گرفتار کرلیا۔پی ٹی آئی کے مطابق صرف لاہور سے اب تک 73 کارکنان کو حراست میں لے لیا گیا ہے۔ پی ٹی آئی کے کارکنوں اور رہنماؤں کو 16 ایم پی او کے تحت گرفتار کرکے جیل بھیجنے کا فیصلہ کیا گیا ہے۔
