Raza Musani 
لاہور : لاہور ہائیکورٹ کے حکم پر عمران خان کی گرفتاری کیلئے گذشتہ روز سے جاری آپریشن روک دیا گیا۔ لاہور ہائیکورٹ نے پاکستان تحریک انصاف کی آپریشن کیخلاف درخواست کی سماعت کی اور پولیس کو حکم دیا کہ جمعرات کی صبح دس بجے اگلی سماعت تک زمان پارک میں آپریشن روک دیا جائے۔ درخواست کی مزید سماعت صبح دس بجے ہوگی۔ آپریشن روکنے کے حکم نے عمران خان کو ہرصورت گرفتار کرنے کے خواہشمندوں میں صف ماتم بچھ گئی ہے۔ پولیس نے عمران خان کی گرفتاری کیلئے منگل کو دن ڈھائی بجے آپریشن شروع کیا تھا جو آج بھی دن بھر جاری رہا۔ پولیس نے کئی بار زمان پارک کی جانب پیش قدمی کی کوشش کی لیکن کامیاب نہ ہوسکی۔ اندھا دھند شیلنگ سے لوگوں کا سانس لینا دشوار ہوگیا ۔ لاٹھی چارج اور پتھراؤ سے اہلکاروں سمیت درجنوں افراد زخمی ہوگئے۔ پولیس نے درجنوں کارکنوں کو گرفتار کرلیا۔ ادھر سابق امریکی سفیر زلمے خلیل زاد نے خبردار کیا ہے کہ عمران خان کی گرفتاری سے پاکستان میں جاری سیاسی بحران مزید سنگین ہوجائے گا۔ سیاسی لیڈروں کو جیلوں میں ڈالنا، پھانسی پر لٹکانا یا قتل کرانا غلط روش ہے۔ جون میں قومی سطح پر انتخابات کا اعلان کیا جائے تاکہ تباہی سے بچا جاسکے۔
