Raza Musani 
تہران: ولی امر مسلمین آیت اللہ سید مجتبیٰ خامنہ ای نے کہاہےکہ ایران کی دلیرانہ مزاحمت نے ملک کو دشمن کا مقابلہ کرنے کے لیے مزید مضبوط اور تیار کردیا ہے۔ ایران نے حالیہ امریکا اور صیہونی حملوں کے خلاف ثابت کیا کہ دشمن کی جارحیت کے خلاف جدوجہد میں پوری قوم متحد ہے۔
حکیم ابوالقاسم فردوسی کی یاد اور فارسی زبان کے تحفظ کے دن پر ایک پیغام میں آیت اللہ مجتبیٰ خامنہ ای نے کہا کہ حالیہ امریکا اور اسرائیل کیخلاف مقدس دفاع کے دوران ایرانی قوم نے ثابت کردیا کہ فردوسی کی شاہنامہ میں بیان کردہ داستانیں محض افسانے نہیں بلکہ ایرانی قوم کے کردار اور زندگی کی حقیقی عکاسی ہیں۔ ایرانی قوم کی مزاحمت، دفاع اور فتح کی یہ داستان اہلِ قلم، فنکاروں اور ثقافتی شخصیات پر بڑی ذمہ داری عائد کرتی ہے کہ وہ اس قومی جدوجہد کو تاریخ میں ہمیشہ کیلئے محفوظ بنائیں۔
آیت اللہ مجتبیٰ خامنہ ای نے کہا کہ فارسی زبان صرف بولنے اور لکھنے کا ذریعہ نہیں بلکہ یہ ایرانی قوم کی فکری شناخت اور شعوری ربط کا بنیادی ستون ہے۔ انہوں نے کہا کہ فارسی زبان اور ادب اسلامی ایران کی عظیم ثقافت اور تہذیب کو دنیا بھر میں فروغ دینے کی سب سے بڑی صلاحیتوں میں سے ایک ہیں۔
