Raza Musani 
نیویارک: اقوام متحدہ کی سلامتی کونسل کے ارکان نے غزہ میں التابعین اسکول پر حملے کی مذمت کردی۔ الجزائز کی درخواست پر سلامتی کونسل کا ہنگامی اجلاس ہوا جس میں التابعین اسکول پر حملے کا جائزہ لیا گیا۔ روس اور چین نے اسرائیل کو ہتھیاروں کی مدد کرنے پر واقعے کا ذمہ دار امریکا کو ٹھہرایا۔ اقوام متحدہ میں چین کے مستقل نمائندے فو کانگ نے اسرائیل کے جنگ بندی معاہدہ قبول کرنے کے امریکی دعوے کو رد کرتے ہوئے کہا کہ اسرائیل کے جنگ بندی کے عزم کی کوئی نشانی نظر نہیں آتی ہے۔ فوجی کارروائیوں اور شہریوں کی ہلاکتوں میں مسلسل اضافہ ہورہاہے۔ امید ہے کہ امریکہ جنگ بندی کیلئے مخلصانہ اور ذمہ دارانہ اقدامات کرے گا۔ روس کے ایلچی دمتری پولیانسکی نے کہا کہ امریکا نے سلامتی کونسل کے اراکین کو یرغمال بنایا ہوا ہے۔ جو فوری جنگ بندی کی جانب کسی بھی اقدام کو روکتا ہے۔ انہوں نے کہا کہ اسرائیلی حملوں کی صرف مذمت سے کام نہیں چلے گا۔
