جیل میں چیئرمین پی ٹی آئی کی زندگی کو خطرہ، سپریم کورٹ نوٹس لے، اہلیہ

اسلام آباد: سابق وزیراعظم عمران خان کی اہلیہ نے جیل میں اپنے شوہر کی زندگی کو سنگین خطرے میں قرار دے دیا۔ بشریٰ بی بی نے جیل میں ملاقات کے بعد سپریم کورٹ میں بیان حلفی جمع کرادیا۔ بشریٰ بی بی نے بیان حلفی میں لکھا کہ جیل میں عمران خان کی صحت خراب ہو رہی ہے۔ دوران قید ان کا وزن بھی کم ہوا ہے۔ 70 سالہ شخص کی گرتی صحت ان کی زندگی کے لیے سنگین خطرہ ہے۔ سپریم کورٹ نوٹس لے۔ بشریٰ بی بی نے کہا کہ عمران خان آئین اور قانون کی حکمرانی کے ساتھ کھڑے ہیں اور جدوجہد، ہر قربانی دینے اور مشکل کا سامنے کرنے کے لیے پُرعزم ہیں۔ ادھر لاہور کی انسداد دہشت گردی عدالت نے پولیس کو 9 مئی کے پرتشدد واقعات سے متعلق مزید 6 مقدمات میں عمران خان سے پوچھ گچھ کی اجازت دے دی۔