Raza Musani 
قاہرہ : اسرائیلی چینل بارہ کے مطابق شرم الشیخ میں امریکی ایلچی اسٹیو وٹکوف اور جیرڈ کشنر کی سینئر حماس رہنماؤں سے خفیہ ملاقات غزہ میں جنگ بندی معاہدے کے حصول میں فیصلہ کن ثابت ہوئی۔ رپورٹ کے مطابق امریکی وفد کو حماس رہنماؤں سے ملاقات کی اجازت امریکی صدر ٹرمپ نے دی تھی۔ بدھ کی رات جب شرم الشیخ میں جاری مذاکرات میں تعطل پیدا ہوا تو قطری ثالثوں نے امریکی وفد کو تجویز دی کہ وہ براہِ راست حماس نمائندوں سے ملاقات کریں تاکہ پیش رفت ممکن ہو سکے۔ پینتالیس منٹ جاری رہنے والی اس نشست میں وٹکوف نے حماس کو باور کرایا کہ یرغمالیوں کا معاملہ اب تنظیم کے لیے اثاثے کے بجائے بوجھ بن چکا ہے، اور انہیں قیدیوں کے تبادلے کے پہلے مرحلے پر آگے بڑھنا چاہیے۔ حماس رہنما خالد الحیہ کے استفسار پر وٹکوف نے جواب دیا کہ صدر ٹرمپ کا پیغام یہ ہے کہ آپ کے ساتھ منصفانہ برتاؤ کیا جائے گا۔ وہ امن منصوبے کے تمام بیس نکات کی حمایت کرتے ہیں اور ان پر عملدرآمد یقینی بنائیں گے۔ اس ملاقات کے بعد حماس رہنماؤں نے مصری، قطری اور ترک ثالثوں سے الگ مشاورت کی اور پھر اعلان کیا گیا ہے معاہدہ پر اتفاق ہوگیا ہے۔
