Raza Musani 
مالدیپ : مالدیپ حکومت نے فلسطینیوں سے یکجہتی کرتے ہوئے اسرائیل سیاحوں کے داخلے پر پابندی لگادی۔ سیاحت مالدیپ کا بڑا ذریعہ آمدنی ہے۔ گذشتہ سال 15 ہزار سے زائد اسرائیلی سیاحوں نے مالدیپ کا رخ کیا تھا اس کے باوجود مالدیپ کے صدر محمد معیزو نے جرات مندانہ قدم اٹھایا ہے۔ مالدیپ کے صدارتی دفتر سے جاری اعلامیے میں کہا گیا ہے کہ ملک میں اسرائیلی پاسپورٹ ہولڈرز کے داخلے پر پابندی عائد کی جارہی ہے۔ مالدیپ کی حکومت کی جانب سے اسرائیلی شہریوں کے ملک میں داخلے پر پابندی عائد کرنے کے بعد اسرائیل نے اپنے شہریوں کو مالدیپ چھوڑنے کی ہدایت کردی۔ اسرائیلی وزارتِ خارجہ کے بیان میں کہا گیا ہےکہ اگراس وقت مالدیپ میں موجود اسرائیلیوں کو پریشانی کا سامنا کرنا پڑتا ہے تو ہمارے لیے ان کی مدد کرنا مشکل ہو جائے گا۔ بیان میں مزید کہا گیا ہے کہ اسرائیلی شہری اسرائیلی پاسپورٹ کے علاوہ کسی دوسرے ملک کے پاسپورٹ پر بھی مالدیپ کا سفر کرنے سے گریز کریں۔
