سینیٹرز اور ایم پی ایز خریدنے کے لیے اربوں روپے اور سیلاب متاثرین کو بے یارو مددگار چھوڑ دیا گیا، سراج الحق

اسلام آباد : امیر جماعت اسلامی سراج الحق کا کہنا ہے کہ حکومت کے 10 بڑے لوگ اگر اپنی دولت کی زکوٰۃ دیں تو عالمی اداروں کی ضرورت ہی نہ پڑے۔ سینیٹرز اور ایم پی ایز خریدنے کے لیے اربوں روپے خرچ کیے گئے لیکن سیلاب متاثرین کو بے یارو مددگار چھوڑ دیا گیا۔ سیاسی جماعتیں سیاست ایک طرف رکھیں، موجودہ حالات میں پوری قوم کو متفق ہو کر مقابلہ کرنے کی ضرورت ہے۔انہوں نے کہا کہ حکومت نے پیشگوئی کے باوجود لوگوں کو بچانے کا انتظام نہیں کیا، جب تک کوئی سانحہ رونما نہ ہوجائے حکومت سوتی رہتی ہے۔ سراج الحق کا کہنا تھا کہ پنجاب اور سندھ میں جاگیر داروں نے اپنی زمینیں بچانے کے لیے لوگوں کی طرف پانی چھوڑا، کوہستان میں لوگوں کو بچانے کے لیے میں نے خود بھی فون کیا لیکن بے حس سیاستدانوں کے کانوں پر جوں تک نہ رینگی۔ مکان کے لیے 5 لاکھ دینے کا اعلان مذاق ہے، اتنے میں تو کمرہ نہیں بنتا۔