Raza Musani 
مکہ : پانچ روزہ مناسک حج کا آغاز ہوگیا ہے۔ عازمین حج منی پہنچنا شروع ہوگئے ہیں۔ سعودی حکام کے مطابق دنیا بھر سے لاکھوں عازمین سعودی عرب پہنچے ہیں۔ جہاں سیکیورٹی کے انتظامت مکمل کرلیے گئے ہیں۔ منی میں دنیا کی سب سے بڑی خیمہ بستی میں قیام کریں گے۔ حج کا رکن اعظم وقوف عرفہ ہفتے کو ادا کیا جائے گا۔ سعودی میڈیا کے مطابق اس سال خطبہ حج اردو سمیت 20 بین الاقوامی زبانوں میں نشر کیا جائے گا اور یہ خطبہ دنیا کے ایک ارب سے زائد لوگ سن اور دیکھ سکیں گے۔ مشاعر مقدسہ ٹرین کی سروس کا آغاز بھی ہوگیاہے۔ مشاعر مقدسہ جدید ٹرین سروس منیٰ، مزدلفہ اور عرفات کے درمیان نو مختلف اسٹیشنوں کے لیے چلا کرے گی۔وزارت صحت نے واضح کیا کہ حج کے ایام میں ابتدائی طبی امداد کے پانچ ہزار چار سو مردو خواتین رضاکار ذمہ داریاں انجام دیں گے۔ سعودی عرب کے مذہبی امور کے وزیر توفیق الربیعہ حال ہی میں یہ کہہ چکے ہیں کہ حج کے موقع پر کوئی سیاسی سرگرمی برداشت نہیں کی جائے گی۔
