Raza Musani 
ڈھاکا : بنگلادیش کی عبوری حکومت کے سربراہ محمد یونس نے تمام سیاسی رہنماؤں کو مذاکرات کی پیش کش کردی۔ پیرس سے وطن واپسی پر نوبل انعام یافتہ ماہر معیشت محمد یونس ڈھاکہ پہنچے تو آرمی چیف اور طلبا تحریک کے رہنماؤں نے ان کا استقبال کیا۔ اس موقع پر محمد یونس نے کہا کہ طلبا نے ملک کو بچالیا۔ اب ہمیں آزادی کی حفاظت کرنی ہے۔ بنگلہ دیش پھر آزاد ہوگیا ہے۔ انہوں نے کہا کہ سابق وزیراعظم نے ظلم اور جبر کی انتہا کردی۔ حسینہ واجد نے اپنے اقتدار کیلئے کئی بہترین بنگلہ دیشیوں کو قتل کیا۔ شیخ حسینہ کے استعفے اور ملک سے فرار کے بعد ایک سازش کے تحت اقلیتوں پر حملے کیےگئے۔ اب ہمیں ملک میں امن اور استحکام کے لیے کام کرناہے۔ انہوں نے کہا کہ عوام امن و امان کو یقینی بنائیں وہ عوام کو یقین دلاتے ہیں کہ بے روزگاری، غربت اور عوامی مسائل کا خاتمہ کردیا جائے گا۔ بنگلہ دیش کی عبوری حکومت میں ماہرین، عوامی خدمت کے جذبے سے سرشار افراد کو شامل کیا گیا ہے۔ جو ملک و قوم کی خدمت میں کوتاہی کرے گا وہ اس کو جواب دہ ہوگا۔ ادھر بنگلہ دیش میں وکلا تنظیموں نے چیف جسٹس کو مستعفی ہونے کیلئے چوبیس گھنٹے کا الٹی میٹم دے دیا۔ جمعرات کو وکلاء نے "تعصب کے خلاف وکلاء رابطہ کونسل” کے بینر تلے بی این پی- جماعت اسلامی کے ساتھ اتحاد کا اعلان کیا اور احتجاجی مارچ کیا ۔ مارچ کے دوران چیف جسٹس عبید الحسن اور اپیلٹ ڈویژن کے تمام ججوں سے استعفیٰ کا مطالبہ کیا گیا.
