فلسطینی اور شامی باشندوں کے مصر میں داخلے پر پابندی

قاہرہ : مصر نے امریکا اور کینیڈا سمیت کئی ممالک سے آنے والے فلسطینیوں اور شامی باشندوں کے داخلے پر پابندی لگادی ہے۔ سعودی نیوز نیٹ ورک کی رپورٹ کے مطابق مصری حکام نے شام، سوڈان، لیبیا، عراق اور یمن سے آنے والے فلسطینیوں کو تا حکم ثانی مصر میں داخل ہونے سے روکنے کا فیصلہ کیا ہے۔ مصری حکام نے یورپی، امریکی اور کینیڈین نژاد شامی باشندوں کے ملک میں سکیورٹی کی منظوری کے بغیر داخلے پر پابندی لگادی۔ فیصلے میں شینگن ویزا رکھنے والے شامیوں کو مصر میں داخلے کی اجازت دینے سے روکنا اور شامی باشندوں کے داخلے پر پابندی بھی شامل ہے۔ چاہے وہ مصری مرد یا عورت کے شوہر یا بیوی ہوں۔ مصری وزارت خارجہ نے شام کے لیے مصر کی حمایت، اس کی خودمختاری، اتحاد اور علاقائی سالمیت کے احترام اور شام کی حمایت کے مقصد سے علاقائی اور بین الاقوامی برادری کے درمیان ہم آہنگی کو مضبوط بنانے کا اعلان کیا۔