تبرکات کی نیلامی ناپسندیدہ فعل، علامہ شہنشاہ حسین نقوی کا یہ سلسلہ بند کرنے پر زور

کراچی : علامہ شہنشاہ حسین نقوی نے تبرکات کی نیلامی کو ناپسندیدہ فعل قرار دیتے ہوئے یہ سلسلہ بند کرنے پر زور دیا ہے۔ علامہ شہنشاہ حسین نقوی ہدایت ٹی وی پر تقریب میں شریک تھے اور اس میں بعض تبرکات کی نیلامی کی جانی تھی۔ میزبان نے جیسے ہی تبرکات کی نیلامی کا سلسلہ شروع کیا علامہ شہنشاہ حسین نقوی نے میزبان سے اپنے خیالات کا اظہار کرنے کیلئے مائیک طلب کیا اور کہا کہ تبرکات کی اس طرح نیلامی اچھا فعل نہیں۔انہوں نے کہا کہ یہ درست ہے کہ ادارے مالی تعاون کے بغیر نہیں چلتے لیکن مالی تعاون کا یہ انداز غلط ہے۔ دینی ادارے مالی تعاون کیلئے اپنا انداز اختیار کریں۔ اور نیلامی کے سلسلے کو یہیں روک دیں کیونکہ تبرکات سے متعلق ہدیہ کی بات ہی نہیں ہونا چاہیئے۔