Raza Musani 
غزہ: صیہونی فوج کی غزہ میں نسل کشی کی جنگ جاری ہے۔ رات سے جاری حملوں میں مزید بتیس فلسطینی شہید اور سو سے زائد زخمی ہوگئے۔ دیر البلاح شہر میں ایک گھر پر اسرائیلی بمباری میں چھ بچوں سمیت سات فلسطینی شہیدہوگئے۔ جنوب مشرق میں صابرہ اور زیتون محلے اور جبالیہ کو بھی ڈرون حملوں کا نشانہ بنایا گیا۔ وسطی غزہ میں بھی گولہ باری اور بمباری کی گئی، جس سے کئی مکانات تباہ ہوگئے اور کئی معصوم اور بے گناہ فلسطینیوں کی جان گئی۔ وسطی غزہ میں مزاحمت کاروں سے لڑائی کے دوران صیہونی فوج کے دو میجر مارے گئے۔ جس کی صیہونی فوج نے تصدیق کردی ہے۔
الزویدہ میں شہید ہونیوالے ایک ہی گھر کے پندرہ افراد کو سپرد لحد کردیا گیا۔ شہدا میں نو بچے بھی شامل ہیں۔
غزہ میں روزانہ درجنوں شہید ہونے والوں کی تدفین کیلئے قبرستانوں میں جگہ ختم ہوگئی ہے اور شہدا کو جہاں جگہ ملتی ہے وہیں سپرد خاک کیا جارہاہے۔ صیہونی فوج نے شمالی حصوں پر مکمل فوجی کنٹرول حاصل کرنے کیلئے بیت حنون، شیخ زید اور بیت لاہیا کے کچھ حصوں سے فلسطینیوں کے انخلاء کے نئے احکامات جاری کیے ہیں۔
