غزہ میں اسکولوں پر حملہ، مختلف مقامات پر بمباری، مزید 56 فلسطینی شہید

غزہ : صیہونی فوج نے ایک بار پھر غزہ میں دو اسکولوں پر حملے کئے ہیں۔ صیہونی فوج نے جنوبی غزہ میں زہرہ اور عبدالفتاح اسکول کو نشانہ بنایا جس میں بارہ فلسطینی شہید اور کئی زخمی ہوئے۔ المواصی میں اسرائیلی فوج کی بمباری کے بعد پناہ گزین کیمپوں میں آگ لگ گئی اور خیمے جلنے اور بمباری کی وجہ سے 26 فلسطینی شہید ہوگئے ہیں۔ فلسطینی وزارت صحت کے مطابق زیادہ اموات جلنے کے باعث ہوئی ہیں۔ اسرائیلی فوج نے المواصی، دیرالبلاح اور مشرقی خان یونس میں سیف زون پر بمباری کی ہے۔ غزہ میں سول ڈیفنس کے اہلکاروں نے زیتون پر حملے میں شہید مزید تین فلسطینیوں کی لاشیں ملبے سے نکال لیں۔ حملے میں شہید افراد کی تعداد سولہ ہوگئی۔ صبح سے جاری صیہونی حملوں میں چھپن فلسطینی شہید اور درجنوں زخمی ہوئے۔