Raza Musani 
اسلام آباد: پاکستان سمیت دس ممالک نے گلوبل صمود فلوٹیلا پر اسرائیلی حملے کی شدید مذمت کرتے ہوئے اسے بین الاقوامی قانون کی کھلی خلاف ورزی قرار دیا ہے۔ پاکستان، ترکیہ، بنگلہ دیش، برازیل، کولمبیا، انڈونیشیا، اردن، لیبیا، مالدیپ اور اسپین کے وزرائے خارجہ نے مشترکہ بیان میں فلوٹیلا سے زیر حراست کارکنوں کی فوری رہائی کا مطالبہ بھی کیا گیا ہے۔
بیان میں کہا گیا کہ یہ بحری قافلہ ایک پرامن انسانی مشن تھا جس کا مقصد فلسطینی عوام کو درپیش سنگین انسانی بحران کی جانب عالمی توجہ مبذول کرانا تھا۔ وزرائے خارجہ نے بین الاقوامی پانیوں میں امدادی جہازوں اور انسانی حقوق کارکنوں کے خلاف اسرائیلی کارروائیوں پر شدید تشویش ظاہر کرتے ہوئے کہا کہ شہری جہازوں پر حملے اور کارکنوں کی من مانی گرفتاری بین الاقوامی قانون اور انسانی قوانین کی صریح خلاف ورزی ہیں۔ مشترکہ اعلامیے میں کہا گیا کہ پرامن انسانی مشنز کو مسلسل نشانہ بنانا اسرائیل کی جانب سے بین الاقوامی قانون اور جہاز رانی کی آزادی کو مسلسل نظرانداز کرنے کا ثبوت ہے۔
