Raza Musani 
اسلام آباد : وزیراعظم شہباز شریف کی زیر صدارت ایپکس کمیٹی کے اجلاس میں دہشت گردوں کے خلاف سخت کارروائیاں جاری رکھنے پر اتفاق کیا گیا ہے۔ ذرائع کا کہنا ہے کہ اجلاس میں نیشنل ایکشن پلان پر سختی سے عملدرآمد کرنے پراتفاق کیا گیا۔ اجلاس میں ملکی امن وامان کی صورتحال پر تفصیلی غور کیا گیا۔ ایپکس کمیٹی کے اجلاس میں نیشنل ایکشن پلان پر صوبوں میں کوآرڈینشن مزید بہتر کرنے پر بھی اتفاق کیا گیا ہے۔ ذرائع کے مطابق اجلاس میں اس بات پر بھی اتفاق کیا گیا کہ نیکٹا اور سی ٹی ڈی کو مزید فعال اور مضبوط بنایا جائے گا، دہشت گردی کے خلاف بلا تفریق کارروائیاں جاری رکھی جائیں گی۔ اجلاس میں اتفاق کیا گیا کہ دہشت گردوں کی کمر توڑی جائے گی۔ نیشنل اپیکس کمیٹی نے تمام قانون نافذ کرنے والے اداروں کو مضبوط بنانے پر اتفاق کیا۔
