نصیرات پناہ گزین کیمپ میں ایک اور اسکول پر حملہ، متعدد فلسطینی شہید

غزہ : صیہونی فوج نے نصیرات پناہ گزین کیمپ میں ایک اور اسکول پر بم برسادئے۔ صیہونی فوج نے اسکول میں قائم بے گھر فلسطینیوں کے کیمپ کو نشانہ بنایا۔ حملے سے اسکول کی عمارت کا بڑا حصہ تباہ ہوگیا۔ حملے میں متعدد فلسطینی شہید و زخمی ہوگئے۔ شہدا اور زخمیوں میں خواتین اور بچے بھی شامل ہیں۔ اسرائیلی فورسز نے شمالی غزہ میں بھی ایک مکان پر بمباری کی جس میں پانچ فلسطینی شہید ہو گئے۔ خان یونس کے جنوبی علاقوں میں بھی حملے کئے گئے۔ صیہونی فوج نے غزہ سٹی اور بیت حنون پر بھی فضائی حملے کئے۔ دیرالبلاح میں ڈرون نے دو مکانات کو نشانہ بنایا جس میں تیرا فلسطینی شہید اور کئی زخمی ہوئے۔
ادھر حماس کے عسکری ونگ القسام بریگیڈ نے صیہونی فوج کیخلاف جوابی کارروائیاں کی ہیں۔ جس میں کئی فوجی ہلاک و زخمی ہوئے۔ دیر البلاح میں صیہونی فوجیوں پر گھات لگاکر حملے کئے گئے۔