امریکا کی 21 ریاستوں کا ٹرمپ حکومت پر مقدمہ

تھری ڈی پرنٹیڈ گن کی ڈیزائنوں کی انٹرنیٹ پر اشاعت سے غیر رجسٹرڈ اور ایسے اسلحہ کی تیاری کی راہ کھل جائے گی جسے تلاش نہ کیا جاسکے،درخواست میں موقف
گھوسٹ گن ہم میں سے ہر ایک کیلئے خطرہ ہے،اٹارنی جنرل، ڈیزائنوں کو ڈاؤن لوڈ کر کے خود ہی ہتھیار بنانے کا امکان پیدا ہو جائے گا،درخواست گذار
واشنگٹن (نیوز ڈیسک) امریکا کی21 ریاستوں اورضلع کولمبیا پر مشتمل اتحاد نے ٹرمپ انتظامیہ کے تھری ڈی پرنٹڈ بندوق کے بلو پرنٹس کی آن لائن اشاعت دینے کے اقدام کو عدالت میں چیلنج کردیا ہے،نیویارک کے اٹارنی کی زیر قیادت دائر درخواست میں موقف اختیار کیا گیا ہے کہ تھری ڈی پرینٹیڈ گن کی ڈیزائنوں کی انٹرنیٹ پر اشاعت سے غیر رجسٹرڈ اور ایسے اسلحہ کی تیاری کی راہ کھل جائے گی جسے تلاش نہ کیا جاسکے،اٹارنی جنرل نے کہا کہ گھوسٹ گن ہم میں سے ہر ایک کیلئے خطرہ ہے، یہ 3D پرنٹ شدہ ہتھیار غیر رجسٹرڈ، ناقابل شناخت ہیں، نیویارک کی اٹارنی جنرل لیشیا جیمس نے کہا کہ انٹرنیٹ پر ان ڈیزائنوں کی اشاعت سے ہر کسی کے لئے ان ڈیزائنوں کو ڈاؤن لوڈ کر کے خود ہی ہتھیار بنانے کا امکان پیدا ہو جائے گا،جن ریاستوں نے قانون کو چیلنج کیا ہے ان میں، واشنگٹن ڈی سی، کولراڈو، اوریگن، ورجینیا، کنٹی کٹ بھی شامل ہیں،، امریکا کی وفاقی عدالت نے گذشتہ سال نومبر میں ایک حکمنامہ کے تحت ہتھیاروں کے ڈیزائن شائع کرنے پر پابندی لگا دی تھی اس کے باوجود ٹرمپ حکومت نئے قانون بنا کر اس عدالتی حکم سے بچتے ہوئے یہ کام کرنا چاہتی ہے۔