امریکی جنگی جنون کے خلاف کئی ممالک میں احتجاج، اور ریلیاں

امریکا کے کئی شہروں میں بھی عوام سڑکوں پر نکل آئے،ایران پر ممکنہ حملے اور بغداد میں امریکی جارحیت کیخلاف احتجاج،لاہور میں امریکی قونصلیٹ تک ریلی،پولیس نے آگے بڑھنے سے روک دیا
پنجاب اور سندھ کے کئی شہروں میں احتجاج،جنیوا میں احتجاجی ریلی،روم میں مظاہرہ،نئی دہلی،ممبئی سمیت بھارت کے مختلف شہروں میں احتجاج،سڈنی میں بھی مظاہرہ
واشنگٹن (نیوز ڈیسک)ٹرمپ انتظامیہ کے جنگی جنون کے خلاف امریکا سمیت دنیا کے کئی ممالک میں احتجاجی مظاہرے کئے گئے، امریکا کے کئی شہروں میں عوام سڑکوں پر نکل آئے اور ایران پر ممکنہ حملے اور عراق کے شہر بغداد میں امریکی جارحیت کیخلاف شدید احتجاج کیا، مظاہرین نے مزید کوئی جنگ نہیں،امریکی فوج واپس بلاؤکے نعرے لگائے،پاکستان کے شہر لاہور میں شیعہ جماعتوں کے متحدہ پلیٹ فارم ”اتحاد امت فورم“ کے زیراہتمام مردہ باد امریکا ریلی نکالی گئی،ریلی فیصل چوک مال روڈ سے شروع ہو کر لاہور پریس کلب شملہ پہاڑی چوک پہنچ کر امریکی قونصلیٹ کے سامنے اختتام پذیرہوئی،انتظامیہ نے مظاہرین کو قونصلیٹ تک جانے سے روکنے کیلئے کنٹینرز، بیریئر اور خاردار تاریں لگاکر علاقے کو سیل کردیا،ملتان، جھنگ،گجرات، اندرون سندھ اور گلگت بلتستان سمیت مختلف شہروں میں بھی مظاہرے کئے گئے اور ریلیاں نکالی گئیں،مظاہرین نے امریکا اور اسرائیل سے اظہار برات کیا اور دونوں ممالک کے جھنڈے بھی جلائے، سوئٹزرلینڈ کے دارالحکومت جنیوا میں اقوام متحدہ کے دفتر کے سامنے احتجاجی ریلی نکالی گئی، مظاہرین نے امریکا مردہ باد، جنگ کو روکیں اور انصاف فراہم کرنے کے فلک شگاف نعرے لگائے، مظاہرین نے ایران اور عراق کے پرچموں کے ساتھ ساتھ شہید جنرل قاسم سلیمانی اورابو مہدی المہندس کی تصاویر بھی اٹھارکھی تھیں، اٹلی کے دارالحکومت روم میں بھی امریکی جارحیت کے خلاف مظاہرے ہوئے،نئی دہلی،ممبئی سمیت بھارت کے مختلف شہروں میں بھی مظاہرے کئے گئے،آسٹریلیا کے سینکڑوں طلبا نے سڈنی میں امریکی قونصل خانے کے باہر اجتماع کرکے جنرل قاسم سلیمانی اور ابو مہدی المہندس کو شہید کرنے کے امریکا کے دہشت گردانہ اقدام کی مذمت کی اور امریکا سے شدید نفرت و بیزاری کا اعلان کیا۔