Raza Musani 
تہران : ولی امر مسلمین آیت اللّٰہ خامنہ ای نے کہاہے کہ امریکہ اور صیہونی حکومت کو معلوم ہونا چاہئے کہ وہ ایران اور مقاومتی محاذ کے خلاف جو کچھ کررہے ہیں، اس کا دندان شکن جواب ضرور ملے گا۔ ایرانی طلبا سے خطاب میں سپریم لیڈر نے کہا کہ بات صرف انتقام کی نہیں ہے بلکہ ایک منطقی عمل ہے جو دین، اخلاق اور بین الاقوامی قوانین سے ہم آہنگ ہو۔ مطمئن رہیں کہ ایرانی قوم اور حکام اس حوالے سے کسی قسم کی کوتاہی اور سستی کا مظاہرہ نہیں کریں گے۔ انہوں نے کہا کہ آج بین الاقوامی ظلم کا مقابلہ کرنے کا مسئلہ درپیش ہے۔ ایرانی قوم کے لئے اسلامی تعلیمات سے درس لیتے ہوئے ظلم سے مقابلہ ایک فریضہ بن چکا ہے۔ استکبار نے اس حوالے سے ایرانی قوم کی توہین کی ہے لہذا ایرانی قوم کی جنگ استکبار سے ہے اور آئندہ بھی جاری رہے گی۔ آیت اللہ خامنہ ای نے کہا کہ امریکہ اور اسرائیل کو اپنے کئے کی سزا مل کر رہے گی۔ استکبار سے مقابلہ کرنے کے لئے ایرانی قوم کو علم، فکر، ٹیکنالوجی اور نقشہ راہ کی ضرورت ہے۔ آیت اللہ العظمی سید علی خامنہ ای نے فرمایا کہ امریکی جاسوسی اڈے کے بارے میں کسی کو کوئی شک و تردید نہیں ہے۔ امریکی سفارتخانہ صرف سفارتی سرگرمیوں کا مرکز نہیں تھا بلکہ انقلاب کے خلاف سازشوں کا اڈا اور امام خمینی رح کی جان لینے کے سازشوں کا مرکز تھا۔
