Raza Musani 
زاہدان : ایران پاکستان سرحدی تجارت کی مشترکہ کمیٹی کے نویں اجلاس میں دونوں ملکوں کے درمیان تجارتی تعاون بڑھانے پر زور دیا گیا صوبہ سیستان و بلوچستان کے ادارہ صنعت و تجارت کے سربراہ ایرج حسن پور نے ایران و پاکستان تجارتی کمیٹی کے نویں اجلاس میں کہا کہ تجارتی راہ میں حائل رکاوٹوں کو دورکرنا اور پاکستان کے ساتھ تجارت کو فروغ دینے کے لئے حالات فراہم کرنا وہ پروگرام ہے جس پر ایران اپنے پڑوسیوں کے ساتھ تعلقات کو بڑھانے کے لئے عمل پیرا ہے۔حسن پور نے کہاکہ ایران اور پاکستان کے درمیان دیرینہ ثقافتی ، دینی اور اقتصادی تعلقات ہیں اور یہ روز بروز فروغ پا رہے ہیں دونوں ممالک اپنی ضرورت کا بڑا حصہ باہمی تعاون و تجربے سے پورا کر سکتے ہیں۔ سیکیورٹی ، سماجی اور ثقافتی ترقی سمیت علاقے کی پیشرفت کے لئے سرحدی منڈیوں کی توسیع اہمیت کی حامل ہے اور اس سے عوام کی معیشت اور آمدنی کو غیرمعمولی طور پر بڑھایا جا سکتا ہے۔
