افریقی یونین کا فیصلہ صیہونی حکومت سے سازباز کرنیوالوں کے منہ پر طمانچہ ہے، فلسطینی تنظیمیں

غزہ : حماس اور جہاد اسلامی نے افریقی یونین کے اسرائیل کا مبصر کا درجہ معطل کرنے کے فیصلے کو صیہونی حکومت کے ساتھ سازباز کرنے والوں کے منہ پر زور دار طمانچے سے تعبیر کیا ہے۔ حماس کے رہنما حازم قاسم نے بھی افریقی یونین کے فیصلے کا خیر مقدم کیا اور کہا کہ افریقی یونین نے ثابت کر دیا ہے کہ وہ بدستور فلسطینی عوام کے مسلمہ حقوق کے دفاع کی راہ پر گامزن ہیں۔ جہاد اسلامی تنظیم کے سینیئر رکن احمد المدلل نے کہا ہے کہ افریقی یونین کا یہ اقدام در حقیقت اُن تمام ممالک پر سنگین ضرب ہے جو اسرائیل کے ساتھ تعلقات کی بحالی کی راہ پر گامزن ہیں۔ افریقی یونین کے اقدام نے واضح کر دیا کہ افریقی اقوام اور ممالک فلسطینی کاز کے حامی ہیں۔ اسرائیلی حکومت افریقی براعظم کی دولت کو لوٹ لے گی، اس کی اسٹریٹجک آبی گزرگاہوں کو کنٹرول کرے گی اور افریقی ممالک کے درمیان تنازعات کو ہوا دے گی۔ عرب لیگ نے بھی افریقی یونین کے فیصلے کا خیرمقدم کیا ہے۔